ڈاکٹر جمیل احمد سیدو گروپ آف ٹیچنگ ہاسپٹلز کے نئے میڈیکل سپرنٹنڈنٹ تعینات۔۔ سیدو گروپ آف ٹیچنگ ہاسپٹلز کے نئے میڈیکل سپرنٹنڈنٹ ڈاکٹر جمیل احمد نے اپنے عہدے کا باقاعدہ چارج سنبھال لیا ہے۔ اس اہم موقع پر سابق قائم مقام میڈیکل سپرنٹنڈنٹ ڈاکٹر نجیب اللہ نے باقاعدہ طور پر چارج نئے میڈیکل سپرنٹنڈنٹ کو حوالے کیا۔ چارج کی منتقلی کی تقریب میں ادارے کی دیگر سینیئر قیادت بھی موجود تھی، جنہوں نے اس موقع پر ڈاکٹر جمیل احمد کو عہدہ سنبھالنے پر مبارکباد پیش کی اور ادارے کی ترقی کے لیے بھرپور تعاون کی یقین دہانی کرائی۔ ڈاکٹر جمیل احمد نے عہدہ سنبھالنے کے بعد اپنے عزم کا اظہار کرتے ہوئے کہا کہ وہ سیدو گروپ آف ٹیچنگ ہاسپٹلز کی ٹیم کے ساتھ مل کر ادارے کو مزید ترقی کی راہ پر گامزن کرنے کے لیے پرعزم ہیں۔ انہوں نے کہا کہ ان کی پوری کوشش ہوگی کہ ہسپتال کے تمام مسائل خوش اسلوبی سے حل کیے جائیں۔ ان کا کہنا تھا کہ ہسپتال میں علاج کے لیے آنے والے مریضوں کے ساتھ کسی قسم کی ناانصافی یا امتیازی سلوک نہ ہونے دیا جائے گا اور مریضوں کی خدمت کو اولین ترجیح دی جائے گی۔ انہوں نے مزید کہا کہ ہسپتال میں علاج کی سہولیات کو مزید بہتر بنایا جائے گا تاکہ علاقے کے غریب عوام کو درپیش مشکلات کم ہوں اور انہیں معیاری علاج و معالجہ فراہم کیا جا سکے۔